ټاکل شوې چې نن ماښام ناوخته د ملګرو ملتونو امنیت شورا د افغانستان په تړاو ناسته وکړي.
د افغانستان لپاره د ملګرو ملتونو ځانګړې استازې روزا اوتونبایووا به د دغه سازمان د امنیت شورا غونډې ته د افغانستان د بشري، سیاسي او امنیتي وضعیت په اړه معلومات وړاندې کړي.
په افغانستان کې د ملګرو ملتونو مرستندویه ماموریت یوناما پر خپله ایکسپاڼه لیکلي چې دا غونډه د کابل پر وخت د ماښام په اووه نیمې بجې پیلېږي.
د یادونې ده چې امنیت شورا د لیندۍ پر ۲۴مه هم د افغانستان په اړه غونډه کړې وه.
په دې غونډه کې د ملګرو ملتونو سرمنشي انټونیو ګوټېرېش د افغانستان د امنیتي، اقتصادي، بشري او ټولنیز وضعیت په اړه معلومات وړاندې کړل.