محمودراقي سېلاب قول اردو وايي چې په کاپيسا ولايت کې دوه ځانمرګي بريدګر موخې ته له رسېدو مخکې وژل شوي دي.
په ختيځ کې د ٢٠١ سېلاب قول اردو له خوا د زمري په ١٧مه رسنیو ته په رالېږل شوې خبرپاڼه کې راغلي چې تېره ورځ مازيګر دوو موټرسايکل سپرو ځانمرګو بريدګرو غوښتل چې په تګاب ولسوالۍ کې پر دولتي ځواکونو بريد وکړي.
سرچينې زياته کړې چې دوى د ملي اردو ځواکونو له خوا تر پېژندل کېدو وروسته ويشتل شوي چې له امله يې دواړه وژل شوي او چاودېدونکو توکو يې چاودنه کړې ده.
د کاپيسا د امنيې قوماندانۍ وياند محمد ايوب يوسفزي د دغه خبر د تاييد تر څنګ وويل چې دا پېښه د تګاب ولسوالۍ د احمدزيو په سيمه کې رامنځته شوې ده.
هغه زياته کړه چې يادو بريدګرو غوښتل چې په سيمه کې پر سيمه ييزو پوليسو ځانمرګى بريد وکړي، خو مخې ته تر رسېدلو مخکې ووژل شول.
يوسفزى وايي چې په دې پېښه کې بل چا ته زيان نه دى اوښتى.
سېلاب قول اردو دغه راز ويلي چې په تګاب ولسوالۍ کې د يوې نښتې په ترڅ کې څلور وسله وال طالبان وژل شوي دي.
وسله والو مخالفينو تر اوسه په دې اړه څه نه دي ويلي.

غزني ښار د غزني په ګيلان ولسوالۍ کې د بې پيلوټه الوتکې د بريد په ترڅ کې اووه طالبان وژل شوي او څلور نور ټپيان دي، طالبان هم دغه بريد تاييدوي.
د غزني د امنيې قوماندانۍ وياند فهيم امرخېل د زمري په ١٧مه وويل چې تېره شپه په ګيلان ولسوالۍ کې بهرنيو ځواکونو پر طالبانو هوايي بريد کړى دى.
هغه وايي چې په دغه بريد کې د پاکستانيانو په ګډون اووه طالبان وژل شوي او څلور نور ټپيان دي.
د هغه په وينا چې په بريد کې د وسله والو طالبانو له وسلو ډک يو موټر هم له منځه تللى دى.
د ګيلان ولسوالۍ يوه اوسېدونکي صديق الله وويل چې په دغه بريد کې درې طالبان وژل شوي دي.
هغه زياته کړه: ((دغه موټر ما وليد، درې کسان په کې ناست وو چې وروسته بيا پرې هوايي بريد وشو.))
بل لور ته وسله وال طالبان هم دغه بريد تاييدوي.
د دې ډلې وياند ذبيح الله مجاهد وويل چې په دغه بريد کې يواځې دوه طالبان وژل شوي دي.
هغه وايي چې په موټر کې راکټونه او د هاوان مرمۍ بار وې چې هوايي بريد پرې شوى دى.
د يادونې ده، په دې وروستيو کې په غزني کې هم د امنيتي ځواکونو او وسله والو طالبانو ترمنځ جګړو زور اخيستى چې له امله يې د دغه ولايت اوسېدونکي اندېښمن دي.

همزولي د ځوانانو لپاره ځانګړي ثبت نیم ساعته خپرونه ده چې د ځوانانو سره د دوي د مصروفیتونو ، ددوي د راتلونکو پلانونو ، او په ټولنه کې د ځوانانو د رول او اغېز په اړه خبرې اترې کیږي

په دې خپرونه کې د هغو ستونزو سپیناوی کیږي  چې خلک یې په دولتي ادارو کې په ګوته کوي او د په ګوته شوو ستونزو په اړه د اړوندو ادارو د چارواکو او خلکو سره خبرې کیږي

کابل په افغانستان کې د يوناما چارواکي وايي، د دوى د نوې تګلارې تمرکز به په افغانستان کې د سولې پر مسئله وي او د ملګرو ملتونو د نورو مرسته کوونکو ادارو ترمنځ همغږي به لا پياوړې کړي.
په افغانستان کې د ملګرو ملتونو د سياسي ماموريت (UNAMA) له مطبوعاتي دفتره رسنیو ته په رارسېدلې خبرپاڼه کې راغلي چې يوناما په افغانستان کې د خپلې تګلارې بياکتنه نهايي کړې ده.
د يوناما مشر تداماچي ياماموتو، نن په کابل کې د افغانستان حکومت له اجرايي مشر سره د ليدنې پر مهال وويل: "د نوې ستراتيژۍ ډېر تمرکز به د افغانستان د سولې پر مسئله وي او دې موضوع ته به تر نورو مسايلو وړاندې د لومړيتوب په توګه کتل کېږي."
نوموړي زياته کړه،‌يوناما د ملګرو ملتونو د اړوندو او نورو مرسته کوونکو ادارو ترمنځ‌د همغږۍ پر زياتوالي هم کار کوي او هڅه به يې دا وي ‌چې دا چاره پياوړې شي.
نوموړي د ټاکنو په برخه کې ‌د اجراييه رييس په مشرۍ د چمتووالي وروستيو تياريو په تړاو ناستې ګټورې وبللې او له هغه يې وغوښتل چې دا ډول ناستې دوام ومومي.
په خبرپاڼه کې د اجرايي مشر ډاکټر عبدالله له خولې ويل شوي چې په راتلونکي کې د افغان حکومت په مشرۍ ډېر تمرکز د سولې پر پروسې وي.
دى زياتوي: "افغان حکومت د امنيتي ‌هڅو ترڅنګ د سولې هڅو ته ډېره توجه کړې او د دې برخې تقويت د ستونزو د اساسي حل په توګه وړاندې کوي."
د ملي يووالي حکومت مشرانو له پيله په هېواد کې د سولې راوستل د خپل کار لومړيتوب ګڼلى و، خو دا دى د شاوخوا درېيو کلونو په تېرېدو سره نه يواځې دا چې امنيت او ثبات نه دى راغلى، بلکې جګړو لا زور اخيستى دى. يواځې د حکمتيار په مشرۍ له حزب اسلامي سره سوله شوې ده.
د ده په خبره،‌د ټاکنو پروسه به د ټاکنو د کمېسيون په مشرۍ او د حکومت په ملاتړ په ټول سرعت پر مخ ځي او په دې برخه کې به د خلکو غوښتنې هم په پام کې ونيول شي.
د ټاکنو خپلواک کمېسيون اعلان کړى چې د راتلونکي کال د چنګاښ په ١٦مه به د ولسي جرګي او ولسواليو شوراګانو ټاکنې ترسره کړي.
 عبدالله د يادو برخو د بريا لپاره د سياسي نظام تقويت مهم وباله او زياته يې کړه، چې د حکومت په کچه نوې ګومارنې د سمون پر لور مهم ګامونه دي چې اخيستل شوي .

کابلد احمد شاه مسعود بنسټ مشر  د ملي يووالي حکومت مشران، ملي نفاق ته پر لمن  وهلو تورن کړل او ويې ويل چې دغه حکومت د ملي يووالي تر نامه لاندې هېواد له کړکېچ سره مخ کړ‌ى.
د احمدشاه مسعود بنسټ مشر احمد ولي مسعود نن په کابل کې  يوې خبري غونډه کې حکومت د خلکو د سر او مال په ساتلو کې ناکام وباله ويې ويل چې حکومت تل ترهګريزې پېښې غندي ؛ خو مسووليت نه اخلي او  جرړې يې نه وباسي.
هغه زياته کړه چې د هېواد وضعيت ورځ په ورځ خرابېږي، حکومت  له بې وزلۍ، د ځوانانو روږدېدو، له هېواده د ځوانانو تېښتې او په لسګونو نورو غمونو سره مخ دى.
هغه وويل:" له بده مرغه د ملي يووالي روحيې جوړښتونه،  د قومي،ژبنيو او سمتي قطبونو له امله مات کړل شوي، په ملي يووالي حکومت کې د ‌سرزورۍ نښې څرګندې شوې دي او دا کار د اندېښنې وړ دى."
مسعود،"له ترهګرۍ سره د مبارزې لپاره د ارادې نه شتون، په هېواد کې د روانو لوبو پروړاندې کمزوري، د وړتياوو څنګ ته کېدا، خپل پالنه، د ملي سياست نه شتون" د افغانستان په حکومت کې شته ستونزې وبللې او زياته يې کړه:" ما پخوا ويلي و او خبردارى مې ورکړى و چې حکومت د ټوټه کېدو پر لور روان دى، په روان وضعيت کې بدلون يوه ملي او تاريخي اړتيا ده."
د هغه په وينا، ولسي غورځنګونه، ولسي شوراګانې او ايتلافونه بايد په يو غږ  په نظام کې د بدلون او اصلاح غوښتوونکي شي.
 نوموړي وويل:" موږ د حکومت له لوري کوم بدلون نه وينوو، د ملي يووالي حکومت چې په درې تېرو کلونوکې ونه کړاى شول چې خپل هوکړه ليک عملي کړي، په راتلونکو دوو کلونو کې هم څه نه شي کولى او د هرې ورځې په تېرېدو سره د کړکيچ په جبۍ کې ډوبېږي؛ اوس بايد خلک لاس په کار شي او د ملي وفاق له طرحې څخه په ګټې اخيستنې سره هېواد له روان کړکېچ څخه وژغوري."
 هغه د جزییاتو له وړاندې کېدو پرته وويل:" د حکومت مشران يا پلان نه لري او يا شخصي اجنډا لري، ښه داده چې همدا ستونزې په رسميت و پېژنو او د حل کېدو په لټه کې يې شوو، په ځانګړې توګه د واک د خونړۍ معما د حل په اړه چې افغانستان يې له دې وضعيت سره مخ کړى او دا زموږ اصلي ستونزه ده."
 هغه د ملی یووالی حکومت رامنځ ته کېدو ته په اشارې سره وويل:" حکومت په  وار وار ویلي چې مقابل لوري پروګرام نه لري، موږ د ملي يووالي حکومت له جوړېدو مخکې د ملي يووالي دولت د جوړېدو طرحه درلوده؛خو د ټاکنو اوسنيو دوه واکمنو ټيمونو قناعت ونه کړ؛ تر دې چې د امريکا د بهرنيو چارو وزير راغى او زموږ له سوژې يې ګټه واخيسته.
نن د دوى هر يو د ملي يووالي حکومت په نوم، خپلو شخصي اجنډاوو او ملي نفاق ته لمن وهي، ان د ملي يووالي حکومت د رامنځ ته کېدو موافقه ليک يې هم عملي نه کړ."
 د مسعود بنسټ مشر زياته کړه:" د ملي يووالي دولت د واک د ويشلو په معنا نه دى، د ملي يووالي دولت د واک شريکېدل دي، دوه ګونى ليدلورى نه لري، بلکې ګډه ليدلورى  لري، د ملي يووالي دولت بايد هېواد له کړکېچ څخه وباسي؛ خو له بده مرغه  د ملي يووالي په نامه يې هېواد کړکيچ ته بيولى دى."
 نوموړي دغه راز وويل:" د ملي يووالي حکومت تر نامه لاندې هره ورځ ملي نفاق ته لمن وهي څو د ځان لپاره روان وضعيت خوندي کړي."
مسعود د حکومت په مختلفو کچو کې پر بدلونونو د ټينګار ترڅنګ وويل:" د ملي يووالي حکومت جوړښت او فکر بايد بدلون و مومي . تر هغې چې د دولتي دستګاه په دننه کې بدلون رانه ولي، د هېواد روان وضعيت به بدل نه شي، غميزه به دوام ولري، بايد د تصميم نيونې په مرجع کې بدلون رامنځ ته شي، بدلون د کسانو د بدلېدو، د سياستونو د بدلون، د پروګرامونو بدلون په معنا او د خلکو په غوښتنه بدلون ستونزې حلولاى شي، ذهنونه بايد بدل شي او بدلون بايد پرې تحقق ومومي څو په هېواد کې ستونزې حل شي."
 د مسعود بنسټ مشر زياته کړه چې د ملي وفاق پر طرحې يې کار پيل کړى او په دې اړه له سياستوالو، مدني بنسټونو او اغېزمنو شخصيتونو سره سلا مشورې دوام لري.
د هغه په وينا، که ټول له دې طرحې سره موافقه وکړي، له دغې طرحې څخه په ګټې اخيستنې سره په هېواد کې روانې ستونزې حلېږي، د رڼو او عادلانه ټاکنو لپاره زمينه برابرېږي او افغانان به د قانوني دولت خاوندان شي.

په دغه ټولنیزه او علمي خپرونه کې د اورېدونکو د علمي پوهې د کچې د لوړاوي په موخه  د نړۍ او هیواد د پوهانو، لیکوالانو او د نظر خاوندانو متلونه، غوره خبرې او ویناوې خپریږي