کابل (٢٧ کب ٩٦): د ټاکنو خپلواک کميسيون د ولسي جرګې او ولسواليو شوراګانو ټاکنو د درې مياشتني ځنډ په اعلانولو سره وايي، تر يوې مياشتې پورې د رايې ورکوونکو د نوم ليکنې لړۍ پيلوي.
د ټاکنو خپلواک کميسيون له دې وړاندې د ١٣٩٧ لمريز کال د چنګاښ ١٦ مه نېټه، د ولسي جرګې او ولسواليو شوراګانو د ټاکنو ورځ اعلان کړې وه.
د ټاکنو خپلواک کميسيون عملياتي مرستيالې او کمېشنرې وسيمې بادغيسي، نن د رايې ورکوونکو د نوم ليکنې مواد د ترلاسه کولو په مراسمو کې وويل، راتلونکي کال کې د ټاکنو ترسره کولو پرېکنده هوډ لري او د ټاکنو ترسره کولو د زمينې برابرولو لپاره هلې ځلې پيل شوې دي.
د ټاکنو خپلواک کميسيون يادې چارواکې وويل: "د نوملړ برابرولو لپاره د لومړي ځل لپاره عملي او بنسټيز ګامونه پورته شوي، څو پر بنسټي يې وکولى شو د رايې ورکوونکو نوملړ چمتو کړو."
هغې زياته کړه، د ټاکنو کارتونو ټول يې باطل دي او راتلونکې ټاکنې د رايې ورکوونکو د نوملړ او هويت تذکرو پر بنسټ ترسره کېږي.
د هغې په وينا، ټاکل شوې د رايې ورکوونکو د نوم ليکنې لړۍ د ١٣٩٧ کال د وري مياشتې تر وروستيو پورې پيل او دغه لړۍ به دوه مياشتې وخت ونيسي چې لومړۍ مياشت به يې د ولايتونو په مرکز، ١٥ ورځې د ولسواليو په مرکزونو کې او له هغه وروسته ١٥ ورځې په کليو او بانډو کې دوام ومومي.
هغې د دې خبرې په څرګندولو سره چې هر هېوادوال د هويت تذکرې له مخې ثبتېږي، زياته کړه: "څوک چې د نوم ليکنې په موخه مرکزونو ته راځي، د هغه د تذکرې له ثبت وروسته به په کې امنيتي کوډ ولګول شي چې د ټاکنو په ورځ به په هماغه تذکرې او امنيتي کوډ خپل د خوښې وړ نوماند ته رايه ورکولى شي."
بادغيسۍ وويل: "د ټاکنو خپلواک کميسيون خپل تخنيکي بحثونه ترسره کړي او ډېر ژر به د ولسي جرګې او ولسواليو شوراګانو د ټاکنو کره نېټه په ډاګه کړي او کېداى شي ټاکنې د تلې په مياشت کې ترسره شي."
نوموړې يادونه وکړه، د هېواد غيرعادي او جګړه ييز وضعيت ته په پام سره د ټاکنو کميسيون په يواځې توګه ټاکنې نه شي ترسره کولى.
نوموړې په دغه برخه کې له حکومت، امنيتي بنسټونو، سياسيونو، د ټاکنو نوماندانو او نړيوالې ټولنې د مرستې غوښتنه وکړه.
هغې وويل، اساسي توکي لکه د رايې ورکوونکو د نوملړ د لارښود کتابچې، د رايې ورکوونکو د ثبت کتابچې او ټول هغه اړين لوازم چې د ټاکنو ترسره کولو کې ورته اړتيا ده، په چين او عربستان هېوادونو کې چاپ يا هم پېرل شوي او کميسيون ته رسېدلي دي.